Eisen Betrib am Niewenerwerb bewirtschaft ron 7 ha Land. Dozou gehéiert een knapp 5 ha groussen Bongert an ron 2 ha Weed (Biotoptyp Flachlandmähwiese) an der Hierstgriecht tëschent der Selz an Tandel an ee klengen Bongert direkt hannert eisem Haf zu Longsdrëf.

Iwwer de Wanter 2003/2004 hu mir den eemolegen Bongert vun dem nach just ee puer al Neelchesbiren verbliwwen waren mat 160 Héichstamm-Uebstbeem (Äppel, Biren, Kiischten, Mirabellen, Reine-Clauden, Quetschen, Quidden an Hondsasch) rëm nei ugeplanzt. Zanter 2013 droen d’Beem sou vill dat den éischten Viz konnt an de Verkaf goen. An de Wanteren 2016/2017 an 2017/2018 ass de Bongert nach eng Kéier em 2ha mat 100 Äppel-Héichstämm erweidert ginn.

Déi wichtegst Uebstzort ass bei eis den Apel: an eisem Bongert stinn iwwer 50 verschidden alen Zorten. Dorënner Lëtzebuerger Klassiker wéi den Triumph, den Rambour an d’Renette, mee awer och méi seelen Zorten wéi den Kugelapfel, den Ludivigs Rosenapfel oder den Rambour Papeleu. Mir sinn Member beim Erhalternetzwerk Obstsortenvielfalt vum Pomologenverein a kënnen op Ufro Edelreisser vun alen, schützenswerten Äppelzorten zur Verfügung stellen a leeschten sou e Beitrag zum Erhalen vun eisen regionalen Uebstzorten.

Beweedt geet de Bongert an och de Rescht vun der Weed vun Abrëll/Mee bis September/Oktober (je no Wieder a Fudder op der Weed) mat Ranner (Galloway an Angus), déi mir a Pensioun huelen. Heimat ass eng Notzung an eng Fleeg vum Gréngland garantéiert, sou dat och déi aarteräich Wisen weider bestoen bleiwen.

Gepresst gëtt de Viz bei der Eppelpress  zu Eppelduerf. D’Weiderverabëchtung vum restlechen Uebst maachen mir selwer. Mir verschaffen just dat Uebst dat an eisen Bongerten wiisst.

Den Viz aus dem Bongert an der Hierstgriecht ass säit 2016 EU-Bio an Bio-Lëtzbuerg zertifizéiert.

Säit 2015 hunn mir och ee puer Beienvölker an eisen Bongerten stoen. Och den Hunneg ass bio zertifiéiert. Nieft der Hunnegbei probéiere mir och d’Populatiounen vun den Well Beien an den Hummelen duerch Nisthilfen an Bléiangebot ze fërderen, well si bei schlechtem Wieder eng wichteg Roll bei der Bestëbsung vun den Uebstbeem spillen.